هــــــــل ثورة 25 يناير ثورة سلبية ؟؟!!

السلام عليكم ورحمه الله و بركاته

الموضوع اسمه

هــل ثورة 25 يناير ثورة سلبية ؟؟!!

اكيد في ناس مش عاجبها اسم الموضوع بس انا اخترته بناءاً علي اللي شوفته قدامي و اللي حصل بعد الثورة ..

ندخل ف الموضوع

زي ماكلنا عارفين ان الشعب المصري دا مافيش اطيب منه و انه شعب يتمتع بالفكاهه و انه شعب جميل جداً جداً ,, بس اللي لاحظته بعد الثورة ان في ناس كتيرة اووي بقوا متمردين جداً و بقوا متفرعنين ع الاخر .

و ابسط مثال علي كلامي دا , ان انا كنت مع واحد صاحبي في المرور علشان يطلع رخصه قيادة
طبعاً المرور ماكنش في اي بني ادم يقدر يتكلم مع اي موظف هناك أو حتي يعلي صوته عليه ,
لما روحنا بقى بعد الثورة تعالوا شوفوا ايه اللي كان بيحصل من شباب الثورة و ايه اللي كانوا بيعملوه الشباب المحترمين اللي كانوا بيتكلموا عن الحرية و عن الاحترام و عن الفساد ..إلخ
كانوا واقفين قدام الشباك اللي بيتعمل منه الورق بتاع الرخصه و كان فيه موظف واحد قاعد ورا الشباك و قدامه اكتر من 20 واحد و كلهم عاوزين يخلصوا في وقت واحد و طبعاً دا مستحيل !

الشباب بقى كانوا بيستخدموا الفاااظ خارجه و الفاظ الي يسمعها يلعن اللي بيقولها مليون مرة و طبعاً كل الالفاظ دي كانت بتتقال للموظف اللي ورا الشباك علشان كلهم عاوزين يخلصوا ف وقت واحد والراجل مش مستحمل اصلاً.

والله والله و الله الراجل كان بيتشتم من الشباب و شويه و كانت الدموع هاتنزل من عينيه , و عمال يقولهم يا رجالة اصبروا يا ناس بالراحة كله هايمشي استهدوا بالله و برضه كانوا بيردوا عليه بطريقه غير اخلاقية و طريقة مافيهاش اي نوع من انواع الاحترام للراجل الكبير دا .[ندعوك للتسجيل في المنتدى أو التعريف بنفسك لمعاينة هذه الصورة]

وكل ما واحد يقولهم يا شباب اصبروا و احترموا نفسكم شويه كده عيب , يردوا و يقولوا براحتنا يا عم احنا احرار نعملوا اللي علي مزاجنا طظ ف الحكومة و طظ ف الهيئات كلها احنا عايزين راجل من الحكومة يقدر يجي يتكلم معانا كده و هاتشوف ايه اللي هايحصله.!! No Comment[ندعوك للتسجيل في المنتدى أو التعريف بنفسك لمعاينة هذه الصورة]

اظن لحد كده كفاية يا مصريين هو يعني علشان ربنا كرمنا و انعم علينا و بقينا ف حرية و بقينا عايشين من غير ضغوطات نقوم نعمل كده ؟؟ [ندعوك للتسجيل في المنتدى أو التعريف بنفسك لمعاينة هذه الصورة]

بجد دي مش اخلاق ولاد مصر الرجالة , دي مش اخلاق المسلم اننا نتمرد و نفتري علي غيرنا بحجه الحرية و غياب الامن و عدم الاستقرار ..

و للأسف ماكنش في اي بني ادم ف البلد يقدر يعمل كده او يبقى بالوضع دا قبل الثورة . صح ولا غلط ؟؟

طبعاً انا عارف ان في ناس كتيرة اووي محترمة جداً جداً جداً و بتحترم غيرها سواء كان قبل الثورة او بعدها بس في ناس كتييييييرة اووي كانت و هاتفضل مش كويسة .

سؤالي للجميع ... [ندعوك للتسجيل في المنتدى أو التعريف بنفسك لمعاينة هذه الصورة]

هل ثورة 25 يناير سلبية ؟؟
لما ترتب عليها من فرعنة الشعب علي الموظفين الحكوميين او غير الحكوميين او علي اي شخص عادي !

بجد انا متضايق جداً من اللي بيحصل من الناس دي

ومستني تعليقاتكم ع الموضوع